നീയെന്ന ലഹരി

കാലം തെറ്റിയൊരു കൗമാരമെൻ-

വാതിൽപ്പടിയിൽ ചാരി നിൽപ്പൂ..

നീയൊരു വിഭ്രാന്തിയായെൻ സിരകളിൽ 

പടർന്നു കയറുമ്പോൾ

വീണ്ടുമെത്തിയ പോലെയാ ചാറ്റൽ

പെയ്തൊഴിയാത്തിടവഴിയിലിന്നു ഞാൻ

എന്തൊരു ലഹരിയാണു നീ

യെന്നെ ഞാനറിയാത്തിടങ്ങളിലൊ-

ക്കെയും കൈപിടിച്ചോടുന്നു

നനയാതെ നനഞ്ഞു നാമറിയാതെയെന്ന-

നാട്യത്തിലോടിയണയുന്നു,

പാതി തകർന്നയാ പഴയ വീടിനുള്ളിൽ..!

നമുക്കു മാത്രമായൊരു ലോകമുണ്ടായിരുന്നെങ്കിൽ

നമുക്ക്‌ മാത്രമായൊരു ജന്മമുണ്ടായെങ്കിൽ

നിന്നെ പുണർന്നും ചുംബിച്ചും പ്രണയിച്ചും 

മതിവരാതെയെങ്ങിനെയീ ജന്മം ഞാനൊടുക്കും

പിന്നെയും കണ്ടുമുട്ടാമെന്ന പാഴ്‌ വാക്കിൽ മുഖം- 

ചേർത്ത്‌ അകന്നു പോകുവതെങ്ങിനെ ഞാൻ..!

(Image Courtesy: Google)