രണ്ടാം മരണം

 

മുഖത്തിനു കുറുകെ ഒരു വിറകു-

കൂടി വയ്ക്കപ്പെട്ടു

'നിൽക്കൂ ഒരാൾക്കു കൂടി കാണാനുണ്ട്'

അതെ ഒടുവിൽ അവൾ വന്നു

മനസ്സിൽ തിരമാലകളുയരുന്നു..

ഇനി ദേഹത്തടുക്കിയ മുഴുവൻ ഭാരവും-

തട്ടിത്തെറിപ്പിച്ച് ചാടിയെഴുന്നേൽക്കണം

കണ്ടു നിൽക്കുന്നവർ നടുങ്ങണം

ഞാനൂറിച്ചിരിച്ചു..

എന്റെ മുഖത്തേക്കവൾ നോക്കുമ്പോൾ

കണ്ണുകൾ തുറക്കണം

അവൾ ഭയന്ന് നിലവിളിക്കണം

എനിക്കുറക്കെ ചിരിക്കാൻ തോന്നി

കവിളിൽ ഒരു തണുപ്പ്..

അവളുടെ കൈവിരലുകൾ..

ഞാൻ കണ്ണുകൾ തുറന്നു

ഒരു ചെറുമന്ദഹാസവുമായ് അവൾ

പതിയെ ആ ചെറുവിരലെന്റെ ചുണ്ടുകൾ

കടന്ന് നാവിലെന്തോ പുരട്ടി

'എനിക്കറിയാമായിരുന്നു നീ മരിച്ചിട്ടുണ്ടാവില്ലയെന്ന്,

എന്നെയെത്ര പറ്റിച്ചിരിക്കുന്നു'

അവ്യക്തമായ് ആ ശബ്ദം ഞാൻ കേട്ടു..

ഉറക്കെ കരയാൻ ശ്രമിച്ചു

അപ്പൊഴേക്കും ഞാൻ രണ്ടാമതും മരിച്ചിരുന്നു !